Foron 33 años, ún tres d’otru, nos que la panera del Topu Fartón s’entemecía col pueblu d’Uviéu nes fiestes de San Mateo. Nesti tiempu foi camudando y adaptándose a les situaciones nueves: de primeres, foi una iniciativa d’un partíu políticu de la transición pa participar nes fiestes; depués, formó parte d’un proyectu colectivu de delles organizaciones sociales pa da-yos visibilidá a les sos reivindicaciones. Pero en toos esos años fíxose siempre col trabayu desinteresáu de voluntarios y voluntaries qu’entendíen que pagaba la pena dedicar unes hores o díes del so tiempu llibre pa echar una mano nel Topu. Persabíen que los beneficios diben valir pa financiar locales y actividaes de bien d’organizaciones sociales.
A lo llargo de toos estos años, nel Topu Fartón, nes sos paredes y mostradores, nos sos pegollos y na so xente —lo de dientro y lo de fuera de la barra—, pudieron vese les reivindicaciones de los colectivos sociales del nuestru texíu asociativo y foi, neses feches, el so altavoz y escaparate.
Foron años de munchu trabayu, pero tamién de grandes satisfacciones. La mesma tarde de l’agresión de los fascistes de los Ultrasur, ver la plaza enllena de xente —más de quinientes persones abarrotando la terraza del Topu— y pasar tola nueche sollertes, munchos cachos en silenciu, nuna actitú de solidariedá activa, ye de les coses que te dan más, que te presten y que más recuerdes.
Ye imposible señalar siquiera una mínima parte de tolo que’l Topu Fartón se significó apoyando les causes de la defensa de los derechos humanos, de les situaciones d’inxusticia, opresión, discriminacion o esplotación. Cuando los trabayadores de Duro Felguera se zarraron na Catedral d’Uviéu, tuvieron nel Topu’l so requexu solidariu. Les fuelgues xenerales que concidieron nel cuartu trimestre del añu foron animaes con pancartes nes paredes del Topu tola selmana de fiestes. El pacifismu y les proclames y convocatories movilizadores contra les guerres atoparon sitiu nel chiringu nos años en que fixo falta alzar más la voz. Tamién el feminismu, la llucha contra’l patriarcáu, pol derechu al albuertu, contra les agresiones machistes y la violencia de xéneru, la batalla contra les llinies d’alta tensión, contra la regasificadora del Musel… Qué dicir de la defensa de la causa LGTB: El Topu Fartón foi pioneru na visibilización d’esti colectivu, de la so bandera, de les sos demandes.
El movimientu estudiantil, el movimientu antiglobalización, el 15M… Toos ellos tuvieron presentes en forma de panfletos, dípticos, pancartes, pegatines o mesmamente pintaes y grafittis nos mostradores del Topu: “Manes arriba, esto ye un contratu”, “Les nuestres vides valen mas que los vuestros beneficios”…
El lema “La solidariedá ye la tenrura de los pueblos” siempre recordó los valores del internacionalismu solidariu colos pueblos que sufren dictadures, invasiones y guerres y que se llevanten contra ello, lo mesmo que colos países de l’América Llatina, col pueblu saharaui, el palestín… Y tamién la llucha contra’l racismu, pa sofitar al pueblu xitano, pol derechu de les persones migrantes, pol acoyimientu de les refuxaes…
Y siempre usando l’asturianu como llingua vehicular de tolo que fiximos y en tolos lletreros. Y, cómo non, faciendo que rescamplare la palabra oficialidá como reclamación principal del movimientu de reivindicación llingüística.
Nestos años foron cambiando munches coses. Tamién los vezos de la mocedá y la so manera d’implicase y de participar nes fiestes. Paeznos qu’El Topu Fartón cubrió un ciclu vital más que curiosu y decidimos qu’esti mes de setiembre yá nun nos vamos instalar pa San Mateo. Dexamos pasu pa que nuevos proyectos y asociaciones faigan les sos propuestes pa les fiestes. Tamos nuna época nueva, nuna situación nueva con xente nuevo que tien que volver da-yos vida a los movimientos sociales y a les sos propies y nueves organizaciones coles estructures que-yos paezan más afayadices. Nel Topu Fartón tamos enfotaos en que dende eses estructures nueves van siguir defendiéndose los valores que foron la nuestra seña d’identidá a lo llargo d’estos años. Ta claro que toos nosotros y nosotres vamos siguir defendiéndolos, caún y caúna dende’l sitiu en que teamos.
Y como remate queremos dar les gracies a toles persones que collaboraron con El Topu Fartón en dalgún momentu de la so historia. Esperamos que lleven un bon recuerdu y que nun escaezan los principios, siempre necesarios, qu’inspiraron aquella iniciativa. ¡LLARGA VIDA A LOS VALORES DE SOLIDARIEDÁ, XUSTICIA Y PAZ QUE DEFENDIÓ EL TOPU FARTÓN!